2014年4月26日 星期六

沾仔記 (米芝蓮雲吞麵)

人均消費:HKD$24

雲吞麵其實你同我都一定食過,好唔好食就唔係間間好食,排隊食既你又會唔會考慮呢?我自己就覺得,食碗雲吞麵都唔洗好多時間,如果唔係排得耐都可以考慮。今日黎到中環食,中環一向食野都唔平,沾仔記雲吞麵$24係中環已經算係平價之選。如果你係食晏既時候去食,等位是常識吧,所以我都係等星期六先去食。

話分兩頭,呢間野其實都有幾間分店,但好多人都話中環呢間好食D,咁去食當然搵間好食既去食。

今次推介 ─ 雲吞麵 ($24)

2014年4月22日 星期二

神虎拉麵 (灣仔既足料日式拉麵)

人均消費:HKD$78

灣仔,呢區都係旺中帶靜既區,平時日間都係office,但夜市就差少少。上排睇開Openrice,見到神虎長期高據排行鎊首位,唔知係咪有打手去幫佢手既,但我自己一食,就知佢既湯底真係唔野少。食好野,排隊是常識吧,呢間野食夜晚居多,係灣仔區黎計都算突出,預六點幾好去排,晏D門口大大隻字話湯底賣晒,唯有明天請早。

拉麵係香港已經落地開花,熱潮已經無上年咁heat,好多拉麵店都開分店,但佢地都係一個共通點,就係個湯底,點解可以整到個湯底呢?呢個問題我成日都想知個答案。神虎其實都係Sell 湯底。佢既湯係豬骨湯仲要係好骨膠狀,有D似拉麵來,但無拉麵來咁咸同濃味。

今次推介 ─ 黑虎 ($78)

2014年4月20日 星期日

琛仔小廚 (一家人的西廚房)

人均消費:HKD$43

去到新界,搵食就當然搵D平日唔去既野食啦,有D Special 既野食,今日去既呢間其實係一家人經營既西餐廳,阿爸加阿媽再加個仔,呢間野唔係好大,得8個座位,但區內都有唔少fans,我七點幾去到,都要等位。

呢間野佢base on 日式既開放式廚房,等客人可以一路睇住個廚師,個廚一路煮,加埋佢會同你傾計,你係等食既時候都會覺得好有外國人既屋企既感覺。佢既收費都只係$40幾蚊,同茶記唔差太遠,但Service 同野食就好太多。睇食評,如果你齋睇相就斷定間野好唔好食,咁你就睇唔到野食背後既Service。

牛扒薯蓉 ($43)

陳漢記 (爽滑蝦腸)

人均消費:HKD$17

呢期紅Van熱,今日入大埔搵食,但大埔雞批賣晒,我唯有就轉場,搵過第二間啦,陳漢記就係另一間佳作。呢間野平時都係熱賣腸粉同煲仔飯,聽人講呢間野一到夜晚就會有好多人排隊等位,分分鐘要等成半個鐘,但我又唔係好鐘意排隊等,唯有食tea,叫碟撚手野食下就算啦。一個人食tea,最好就係食碟細野,話晒陣間都仲可以食個飯。我就叫左碟蝦腸。

鮮蝦腸 ($17)

2014年4月16日 星期三

江仔記粉面專家 (銅鑼灣既宵夜雲吞麵)

人均消費:HKD$27

雲吞麵 ($27)

夜晚OT後,係中環想搵野食都唔係好多選擇,10點後其實已經閂晒,你想食都係翠X,唯有轉戰銅鑼灣,又發現唔係好多間野仲開緊,諗起江仔記,佢既麵係爽,鮮蝦都係中蝦,我每次去親,個價錢又好似又加價,唉。佢都叫有五粒中Size 既雲吞。係銅鑼灣食都算係咁。我仲要係宵夜時段去。

一間老店,佢都會有佢先自己既碗同碟,新既食店好多都係求其買番黎。個人食野既時候都會覺得安心D,起碼佢都有heart 諗下個Design。同埋都無咁易執笠。

2014年4月2日 星期三

味佳居越南餐廳 (蔡瀾越南粉)

人均消費:HKD$40

尖沙咀廣東道由放寬自由行後,就已經少左行,一來唔想同佢地迫,二來,D野都好貴,想買都買唔起,咁不如唔好行。返工放工經過就算啦。

今日食既呢間野,就係有蔡瀾Promote。好多時,蔡瀾Promote親既野,都唔係十分正,都有好多野比佢更好食,但今日我又再一嚐蔡瀾推介既越南粉。今日呢間係樓上舖,呢間野,lunch 都係做開海港城既客,但夜晚就唔係好多客,我甚至可以獨佔一間餐廳。一晚都唔係好多檯客,Service 都超好,上菜速度勁快,由落單到碗野上檯,三分鐘有找,我仲擔心緊D牛肉熟未之際,望到片牛都已經唔係好紅既時候,我都照食。

生牛肉湯粉 ($40)