2013年9月20日 星期五

安利魚蛋粉麵 (香港新一代魚蛋粉)

人均消費:HKD$30

自香港仔謝記執左笠之後,想食好既魚旦就真係又少左個地方,筲箕灣都有一間好食既餐廳,佢位處筲箕灣東大街,齋聽東大街三個字就知有好多野食。但一條街入面都有兩間安利。一間係安利魚蛋粉麵,另一間係安利大排檔。兩間都係開業多年,相對地安利魚蛋粉麵會岩香港人鐘意食魚旦既口味。

講開魚旦,點先好食,魚肉要有咬口,爽口彈牙,呢4個字都應該成日聽到,但又有幾多間可以做得到呢。香港仔謝記既魚片魚旦都做得到。我推介得既,安利都OK。

安利魚蛋粉麵有三樣好野,一係魚片;二係牛腩;三係炸魚皮。我今次去到,只係有幸食到其中兩款。食一個切腩魚片撈粗,入面有5樣野,切腩、魚片、撈粗麵、菜同上湯。魚片同牛腩都係呢間野出名既野,最抵食。

今次推介 ─ 切腩魚片撈粗 ($36)

魚旦,魚片,魚片頭,三樣入面最難做到彈牙既係魚片,因為魚片成條比較長身,魚片中段無咁彈牙,原理好似煎牛扒,通常外圍受熱,中間唔受熱咁。魚片可以做到咁彈牙,一係就一整短佢,咁就彈牙D。魚片頭就係一頭一尾,相對易整。安利都應該係整短既魚片。

切腩魚片撈粗仲有切腩同撈粗,佢既牛腩一早已經整好,一大塊一大塊咁,咁食客叫到,佢先切,咁既好處就唔會東一塊,西一塊,肥瘦度相約,呢D就係好野。唔係好多度都可以拎到呢D既貨。At least 都要同供應商夾到,佢先可以供到貨。

撈粗即係普遍鹼水麵撈豉油,呢個就一後啦,佢都好快出鹼水味,可能係出完水耐左DD啦。


魚旦魚片米 ($24)

個魚片就上文講左啦,魚旦就因為佢係粒狀,所以相對起魚片黎計,魚膠打得靚,彈牙魚旦就更容易整到出黎。不過安利話出名,咁就一試。呢個都唔差,可以一試。


佢個Menu 講既都係出名野,咁當然食野又要排隊,咁當然食佢兩樣出名野啦。

好:好食野既魚旦已經買少見少。
壞:食好野要排隊是常識吧。同埋個炸魚皮唔係日日都有得食

光顧日期:20 September, 2013

地址 : 筲箕灣筲箕灣東大街22號
Openrice : http://www.openrice.com/restaurant/sr2.htm?shopid=15987

1 則留言: