自添好運摘取米芝蓮一星餐廳的時候，即時造成點心熱，市面上出現各花各門的點心店，每一間餐廳都要配上獨特的佳餚，離唔開賣相、裝修、選料、廚師手勢。今次呢間叫老點。
有D會仲會做好多Promotion，我都係俾佢既相吸引去幫襯，佢d相真係影得好靚，因為賣相真係好得。不得不讚佢賣相靚，就算低B相機影都唔會影出唔靚既相。佢都係一間新店，用tailor made餐具，有埋間野名，不過不失啦。
選材落功夫，選用價格檔次較高的黑松露、魚翅、蝦、帶子瑤柱，等海鮮，但鮮味就唔係好夠。呢間野可能無相熟海鮮供應商。
今次推介食物 ─ 鮮上肉響鈴腸
腸粉應該香港無咩人未食過。不如分享下普通腸粉製作過程。先整粉醬(熱)，然後加料，再包埋佢，之後上碟。就係咁簡單。今餐鮮上肉響鈴腸，響鈴係脆既，先炸後再冷卻，整熱粉醬，再包埋佢。
功夫就係呢度，響鈴遇上熱粉醬，好易林晒。今次食落既響鈴腸仲係脆，即係話佢各方面時間要夠快，如果唔係咩都林晒。層次感都唔錯，腸粉皮薄加響鈴脆，有層次我鐘意。創意都有d。 $22唔係貴，有6件，料足，俾個Like佢。(big hug)
黑松露魚翅帶子餃 ($22)
聽個名「黑松露魚翅帶子餃」好似好名貴，實情係隻蝦餃。如果你想反問我，$22想點，又有黑松露+魚翅仲有帶子淨係睇材料+人工都已經唔止$22。我想講既係個廚應該知道菜式既特質，想帶子鮮係好難同好貴。
因為蝦既新鮮比率遠高於一隻帶子。佢來貸既帶子好大可能係冰鮮，解凍方法不當，所以造成隻帶子唔係好鮮。魚翅同粉絲其實分別係有，不過點綴係OK；賣相就係呢間野強項。呢隻黑松露魚翅帶子餃只可以話係一般一般，去到可以叫一客試下，叫多客就真係唔好喇。
排骨竹筒飯 ($22)
呢間野門牌寫住「點心 竹筒飯」，咁都要試下個竹筒飯，即時叫左個，但佢既味道方面唔係好吸收到竹筒味，呢個有可能唔係竹筒、藤筒或木筒。佢既味道只係好一般，談不上任何特色，排骨多肥好少肉，份量少不在話下。一般既竹筒飯係蒸爐要夠熱夠大，食物唔夠多，咁先可以蒸到有竹味。呢間老點可能真係地方淺窄，連個蒸爐都唔夠Quality，呢個竹筒飯只可以話係竹筒係裝飾物。可以不食。(it wasn't me)
茶位：$3/位
好：裝修晒，賣相正，去影相一流
壞：等位等得耐，食落又麻麻
簡評：如果你想Facebook, instagram D相靚，又或者有外地朋友到黎，真係不妨一去。本地人想食野就唔一定要去。
光顧日期：7 March, 2013
地址 : 旺角染布房街12-14A號依利大廈地下A號舖
Openrice : http://www.openrice.com/restaurant/sr2.htm?shopid=124481
沒有留言:
張貼留言